سبب إني بكتب هاد المنشور مو رغبة بافتعال مشاكل أو مجاكرة حدا بس لأني بشوف على الصفحات الجزائرية افتخار مبالغ فيه بالعرق (الفينيقي العربي!!!!)
و هاد أكبر سبب بخليكون غير مستحقين للقب الفينيقي ، لأنكم جاهلين بأبسط المعلومات عنو : الفينيقيين مو عرب لأنو هنون (يعني نحن السوريين) من عرق مختلف و حكوا لغة مختلفة و كان عندون ثقافات و أديان مختلفة عن سكان شبه الجزيرة (أساساً مو كل سكان شبه الجزيرة كانوا يسموا حالون عرب) بالإضافة لهالشي ما في وثيقة تاريخية (رغم إنو #أجدادي الفينيقيين تركوا كتير وثائق عن حياتون السياسية و الاجتماعية) بتحكي إنون كانوا أساساً بيعرفوا شي اسمو عرب أو إجو من شبه الجزيرة بالإضافة للأصول الجينية المختلفة للفينيقيين عن العرب و وجود هابلوغروب J2 بكثرة بدمنا (و تقريبا غير موجود لا عند السعوديين و لا الجزائريين)
الوجود الفينيقي بالجزائر كان مجرد استعمار و ما بيكفي ليحول السكان كلهم لفينيقيين بل عالعكس كان الفينيقيين فقط الطبقة الحاكمة و قادة الجيش و المسؤولين و نسبة ضئيلة من الشعب بينما الباقيين هنون سكان شمال أفريقيا الأصليين (لأن أكيد ما كان في سفن كافية تحمل شعب كامل من منطقة لمنطقة و يستبدل السكان الأصليين فجأة! و لأن وقتا بتفضى سوريا و لبنان و الأردن و فلسطين من الفينيقيين و بروحوا كلهم لعندكم 
)
)و لما انتهى الاستعمار أو الاستيطان الفينيقي خلص انتهت الصفة الفينيقية لشمال أفريقيا و اجى الاستعمار الروماني
و هون عندي كذا سؤال للأخوة الجزائريين المعتقدين بأصولن الفينيقية يا ريت يجاوبوا عليها حتى إعترف إنو هنون فينيقيين :
1- ساويتوا فحص DNA و حكالكم إنكم من منطقة الساحل الشامي ؟ لأن لما تعملوا هالفحص عند شركات متل Ancestry لازم تطلع منطقتكم ساحل سوريا و لبنان و فلسطين و الأردن... حتى ما بيطلع شي إلو علاقة بشبه الجزيرة
2- الرومان احتلوا منطقتكم بعد الفينيقيين و بقوا تقريبا نفس الفترة و خاصة إنهم دمروا قرطاج بتونس تدمير كامل و قعدوا محلن فليش ما بتسموا حالكم رومان ؟ أم لأنو استعمال الصفة الرومانية بتبعدكم أكتر عن الأصل العربي المزيف بينما الفينيقي بخليكم تكذبوا بحجة إنو الفينيقيين عرب (و هاد الحكي مو صح لأن الفينيقيين مو عرب)
3- الفينيقيين استوطنوا أجزاء من إسبانيا و قبرص و دول أوروبية تانية مع ذلك ما منسمعهم بيحكوا إنهم فينيقيين ، فليش هاد الادعاء موجود عندكم بس ؟
4- الفينيقيين نفسهم استوطنهم اليونان و الرومان فهل هاد بيعني إنو انتو صرتو مزيج من اليونان و الرومان و الفينيقيين و العرب (كلشي إلا انكم تكونوا سكان أصليين!!!) ؟ أم ليش نحن ساكني منطقة فينيقيا ما منسمي حالنا رومان و إيطاليين و يونانيين ؟
5- وجود حروف فينيقية بالجزائر عالعملات و آثار فينيقية أمر عادي لأن بسوريا في آثار يونانية و رومانية و حثية و غيرها... بس هاد ما بيعني إنو السوريين صاروا غير سوريين و ما في دليل أساساً انو الغرباء هنن بنوها ، ممكن الشعب المحلي هو مين بناها بس على أسلوب غربي ، فليش التمسك كتير بكم عملة حتى تعتبروها بتمثل أصولكم ؟ و لو بدنا نعتمد كلامكم فالسوريين صاروا فرنسيين لأن فرنسا احتلتنا و كمان صرنا عثمانيين لأن العثمانيين احتلونا و كمان نص العالم صار بريطاني لأن بريطانيا احتلت نص العالم و رومان كمان احتلت قسم كبير من العالم و المغول احتلوا الشرق الأوسط.... هيك ما بقي في شعب أصلي حسب منطقكم!
رح فهمكم شغلة ، شايفين لما أمريكا احتلت العراق ؟ رغم إنو أسلحتا فتاكة أكتر من مثلا الامبراطورية الرومانية أو الفارسية قديما بس ما قدرت تستبدل الشعب العراقي و يصير أمريكي ، و لا لما احتلت فيتنام أو سوريا... الاحتلال بكون متمركز بس ما بيستبدل شعب كامل
6- بسوريا و لبنان في كلمات كتير لا تعد من أصول فينيقية و هالشي غير موجود بالجزائر ، هل بدكم تقارنوا حالكم بالسوريين و اللبنانيين يلي الفرق شاسع بينكم و بينهم من ناحية استخدام كلمات فينيقية ؟ يعني بدكم تعتبر ا حالكن فينيقيين بنفس مقدار إني أنا فينيقية ؟ أنا يلي دمي من أرض فينيقيا و على أراضيها الأصلية (غير الاستيطانية) و يلي بحكي كلمات فينيقية و عاداتنا و رقصاتنا و ثقافتنا بعدا متأثرة بفينيقيا بدكم تقارنوا حالكم فيي بعمركم ما شفتوا ساحل فينيقيا حتى!
7- الجزائر قامت فيها حضارات أمازيغية عظيمة ليش حتى تنكروها ؟ أنا هاد الشي لهلا ما بفهموا
لهيك يا ريت قبل ما تنشروا شائعات مغلوطة تتحقوا ، خلي بعلمكم إنو نحن منحب الجزائر كتير بس ما منعتبرا فينيقية و لا منعتبركم بتشبهونا أبدا ، لا ثقافيا و لا لغويا و لا دينيا و لا عرقيا و لا إثنيا ، بس منعتبركم أصحاب حضارات أمازيغية عظيمة و إخوة بالإنسانية
#الجزائر_ليست_فينيقية (ساعدوني بنشر هاد الهاشتاغ و انشروه على صفحاتكم لما تشاركوا المنشور)
ليست هناك تعليقات:
إرسال تعليق